السقساق و الجعران المقدس - جمال الطرودي

- سيّب عليك من ها رويّق ! عامل فيها طز حكمة. هاذي تشنشينة اذا طلّعتها فعلا انت حكيم.
- هات ، نشوف وين ترسّي بينا ها القعدة؟
أنشد السقساق:
- "على وليّد شهلول بهلول كان ساكن في العلالي
و لّى يكركر في الخراء بين رجليه و راسه متلفّت التالي "
- هكّة! توّة هكّة، بديناها بالجد و نكمّلوها بتطييح ال قدر. واش بيك زقزاق برشه !!؟ لو قابلتني في ذلك العصر لجعلت منك قربانا يكفّر به الحشريون أمثالك عن خطيئتهم. لكنّك ما تحشمش يا واطي! أنسيت أم أذكّرك ؟ ألم تر نفسك عندما كان رأسك في مبعر الخرتيت المخلوع تنقّيه من القراد و الدّود ... قووول لا ... ها عويهرة ! يا متاع الكركدن المخلوع ! هذا صرفك و إلّا نزيدك ؟
احمرّ منقار السّقساق خجلا ، طار و دكّ رأسه في دبر أكبر فيل من كبار الكتل. وصار منذ آنئذ يلقب ب " ذو المنقار الأحمر المكبوس".
تدخّل الحاضرون:
- إهدأ ! إهدأ ،ساعد روحك آ سي بودرنّة، ياخه واش قالك؟
- عندكم الحق ما تعرفوش سوء نيّته ! هاو واش يحب يقول
- باهي باهي قول لينا و تعرفه ما يقصدش سي السقساق.
- يحبّ يقول أنّي أنا ؛و أعوذ بالله من كلمة أنا؛ سقطت ، يعني ساقط!
- حاشاك من السقوط،نعرفوك خدّام لا تعاف شيئا.
- السيد يحب يحلّ جرح قديم. يحكي عنّي كيف سقطت من القداسة إلى النّجاسة.
استغرب الدّواب و مدّوا أعناقهم و اتّسعت أحداقهم و قالوا :
- كنت قدّيسا !؟
- بل أكثر!
- ماذا يعني أكثر؟
- كنت إلاها !
- آآآ هه!!!
- نعم كنت إلاها عند المصريين القدامى و كانوا يقدّمون القرابين الى الجعران المقدّس الذي يمثل الإلاه "رع" واهب النور و الحياة و الذي يدحرج الشمس من المشرق إلى المغرب في السماء. وكانوا يسمّونني "خيرى"
علّق أحد الحاضرين :
- خيرى أو خراء من بعضه!
ضحك الجميع حتى استلقوا
- أعوذ بالله! أعوذ بالله، الواحد يبدا قاعد لابأس عليه، مرتاح ، حتى يهبط عليه صفة الزّنس كما الشيطان الرجيم يخرّجه من الملّة. يحرّك الخراء بعود ،حشريّ، يتدخل في أدقّ خصوصيّات الغير. جبالك الرّواسي و لا عبدك الثقيل ! أضاف سي بوزنّة و هذا أحد أسماء الشهرة العديدة للجعران في بلاد الجريد بتونس.
قام سي بوزنّة و قام إثره النّواب و غادروا المشرب. سوف تبدأ جلسة التصويت على قوانين الحرّيّات الفرديّة. دخلوا قاعة المجلس ، حيث ترأّس الجعران المقدّس الجلسة و كان مقرِّرها ذا المنقار الأحمر المكبوس!
استغربوا و لم يفهموا التكتيك.

جمال الطرودي / تونس