ليش العمر مقرون بالأحزان
ولحظة فرح منطالها سرقة
قالوا الألَم بيرافقو النّسيان
ومهما نوَجعنا هالعمر مرقة
ونسيوا بِإنّو العايَش بلبنان
مهما ابتسم بالقلب في حرقة
راحوا الأحبّة غادروا الأوطان
وبعدو القلب موجوع عالفِرقة
قالوا القدَر بيوقّف الطّوفان
بلمحة بَصَر بيعطّل الصّفقة
ومهما علينا تجمّعوا العدوان
النا النّصر . محفور عالورقة
يا هل ترى بعد العمر حرزان ؟!
راح العمر وتفرّقوا الخلاّن
وأرض الوطن بالنّار محترقة
راح العُمُر وِلْكَانْ وَلْمَا كانْ
وخلصِت قوافي الشّعر والأوزان
وبعدو الوَضع ما تغيّر بلبنان
وبعدو الجّرح عمينزف بحرقة
وبعدو الجّرح عمينزُف بحرقة
عناية أخضر
لبنان
اترك تعليقا يدل على انطباعك ورأيك بالموضوع