تمنّيت نكونوا يا عمري
إنت النّجمة، وأنا الغيمة،
كي تبدى ظلماء نهمسلك:
"نوّرلي طريقي بتبسيمة"،
وفي صڨع اللّيل توشوشني:
"دفيلي قلبي بكليمة"
*** *** ***
تمنّيت تشتّي كي شتايا،
وتسقيني من حبّك ديمة،
وتشرب كي تعطش من مايا،
وتنسى حكاياتك لقديمة،
وأنا بقنديلك.يا عمري
ننسى ظلم الدّهر وضيمه
اوْ جيدي تضوّيه ڨلايد
وننسج قصّة حبّ عظيمة.
*** *** ***
تمنّيتك لكنّك جاحد،
ضيّعت الحلمة والقيمة...
ريتش يا جاحد في حياتك
نجمة تلمع من غير غيمة!؟
نهاد المعلاوي
اترك تعليقا يدل على انطباعك ورأيك بالموضوع