ثرثرة حميمة
تعال يا توم نخاصم النوم ..
نسهر ليلنا لبكرة ..
نباري القمرا في مشيها ..
نمد ايدنا ونشيل نجمة ..
ندسها في عيون الريد ..
تنزل دمعة حيرانة نفكر كيف نداريها ..
نصادق العتمة بخوفا ..
ومن جوفا بيشرق فجر متأني ..
يستر عورة الاسرار ..
يفرهد عمرنا التايه ..
يناجي الغنوة والشبال ..
تعال يا توم نخاصم النوم ..
نمط الليل لحد الشوق ..
ونسرح في حكاياته ..
نتامل ..
ونتخيل عوالم تانية تندهنا ونمشّ ليها ..
في دروبا نصادف صاحب المزمار ..
وست العرش ..
وبطيشنا ..
نفتح كل شقوق الارض ..
نطلّع منها المردة ..
نحش الخوف من جذره ...
ونواجه رعشة المجهول ..
تعال يا توم نخاصم النوم...
ونمشى ورا النبي الشق بعصايته االموج ..
نكابد في سنين التيه ..
ونعلن توبة مشفوعة عشان نرجع ..
تعال يا توم نخاصم النوم ...
ونتهور .. نخش سجن العزيز مرة ..
نقصّ احلامنا للشاف العذاب الوان..
نخليه يفسّر لينا كيف يبقى الحلم انسان ..
نتوه نسرح ورا عيونه ..
ويبقى عمرنا من دونه خيال باهت بدون الوان ..
فرح مبتور ..
امل مسجون ..
وانا السجّان ..
تعال يا توم نخاصم النوم ونرفع راية الردّة ..
نشيل فاسنا ..
ونكسّر كل اصنامنا البنيناها وعبدناها بدون تمييز ..
وبرجلينا نمشي النار ونتوهط ..
نخليها تطهَر روحنا من رجز العشق والشوق ..
وتصهر قلبنا الحيران ..
تعال يا توم نخاصم النوم ..
ونعلن اننا اتشهدنا ..
واتوحدنا ..
اتوضينا بموية الصبر المرّ ..
وصلينا فرض الخلاص حاضر ..
تعال يا توم نخاصم النوم ..
لبكرة
ولبعده ..
وبعد بعده ..
سناء جعفر
اترك تعليقا يدل على انطباعك ورأيك بالموضوع