لمحتلك

لمحتلك الف مرة

وانت تعرف غايتي وما طاوعتني

وسولفتلك سالفة عاشگ خجول

وانت تعرف هو ياهو وما عرفته وخجلتني

وسولفتلي على الحرب والموت والدم والضحايا

وكلمة المحتاجها ما سولفتلي

وكلشي گتلي

وكلمة الميت علية عاندت روحك عليها وعاندتني

وبينن كلهن عليك

وانتفض وجهك بوجهي وصيحتني

وضيعتني...

وهسه من طاحن سنيني تذكرتني

ليش من گلبك رجف ما صارحتني؟

وشبيك من عينك خذتني

تذكرت موقف بچيت وطيحتني

ومن اجيتك حته بحچاية چذب ما جاملتني

وانه جيتك غاسل چفوفي بورد من سلميت

وانت غاسل چفك بماي الغرور وصافحتني

وكلشي ما بين عليك

وانه حتى هدومي تهواك وأحسن فاضحتني

يشكن ايامك خسارات وضياع

وانه چي حبيتك سنيني أحسن رابحتني

چان من ضلعي خشبها بلام عمرك

وعبرت حتى اليكرهك بيهن وما عبرتني

وصاح گلبك من سمع طاري الجرح وچفوفي ركضن صبرنه

وانت ياصانع جروحي اللا عفتني ابجي ولا ما صبرتني

ومرة غازلتك چذب واتورطيت

والف مرة اتعذرت وما سامحتني

وتزعل وتاخذ عيوني وما اگلك

شو خذت كلشي لچن ما صالحتني

وصالحيتك وصاحبيتك

وانت انت

صاحبت شعري وابد ما صاحبتني

جبار رشيد

مجلة بويب الثقافية