مامرتاح
عيوني تستحي بس الدموع اوكاح
ما مرتاح
منٌك
منٌي
من الجاي من الراح
ما مرتاح
عركه وي الزمن ورجعنه مكسورين
وبعيده المسافة وينسي اللي طاح
ما مرتاح
لأن شفت الشمس نزلت تبوس الكاع
وبجف الطفل تنلاح
ولأن قاضي البلابل مدد التوقيف
ومفتوحه السما
والفيل عنده جناح
ما مرتاح
لأن قفل المحبة إنباك
وترهم عليه مفتاح
ما مرتاح
متروك بجزيرة وتيهت بالليل
واجو ربعي عليه بقافلة أشباح
وانت اشبيك!!
لمن دافعت عن نفسي صابك غيض
مو حتى الكنافذ من تحس بالخوف
تستخدم جلدها سلاح
ما مرتاح من ربعي ولا مرتاح
تمساح بنهرهم صاحوا من الخوف
وجازفت بحياتي من سمعت اصياح
صارعت المنية وبيده هزني الموت
ومدمى اطلعت
صفكوا للتمساح
كل هذا وتريد ارتاح
ما مرتاح
ولا جن الفجر مثل الفجر محبوب
لون الفجر صاير يقبض الأرواح
رجعت الستارة بحركه عالشباج
ورثيت الورد وبجيت
من شفت الندى فوك المدافع طاح
قل شوف السفينة والضباب يزيد
وسيوف الملامة بجلوة الملاح
ياسن الصخر وتكسرت بالروج
مو كنت بزمانك ترهب السفان
ما مرتاح من ربعي ولا مرتاح
نادووني وركضت ابليل
ايد الرسن بيها وايد بيها سلاح
عثرت مهرتي وربعي قبل ما طيح
واحد كًال للثاني:
ابشرك طاح
ابشرك طاح
كاظم اسماعيل الكاطع
تعليقات
إرسال تعليق
اترك تعليقا يدل على انطباعك ورأيك بالموضوع