انه بروحي العشك مفضوح
جاسم العبيدي
جثيرة سوالف العشاك مثل النار
تاخذنه وتلف شفافنه الشبكة
وتعت ارواحنه الشوغات
واحنه زغار
نتباوك عله البيبان والملكة
روحي ولا عساها تروح
وعيوني بلذيذ الدمع والحركه
نتلاكة بظلام الليل جنه ارواح
سمره بنص سواد الليل متعلكه
شكد شفنه بهوانه عتاب
جا ليش العتب للعاشك يحركة
استحيت وجن وسط مشحوف
روحي تفوج
تتمرجح بسده الماي وتغركه
فزيت وعله عيوني القهر موشوم
ياخوفي شيحملك ونت الفركه
لا روحي الجفتك يوم
لا عين الغفت واتناست الملكه
وجم مرة كلتلك
انه اخاف من الهجر
وسوالف العشاك من تشكه
وجم مرة يطر طيفك علي والكاك
جم مرة اشتهيتك وانته تتوكه
ياروحي شمعزتك وانه روحي وياك
شكد شوغات اتحمل
واظل بالشوك مختنكه
بعيده الفركة عن رويحتي بملكاك
اشمن بيك ماني بهلهوة مصدكة
صفكت الباب رشيت باثر جدميك
هيله الماي بلجن تسمع الصفكة
وترد بحذاي تتيمم لذيذ الصوت
بلجن بيك عبرة وتحسب الرفكة
بجيت وما خفيت الصوت يل تسمع
نواغي الليل بلجن تسمع الشهكة
وانه بروحي العشك مفضوح
بس كلي شحلاته الهوة من يعشكه
تعليقات
إرسال تعليق
اترك تعليقا يدل على انطباعك ورأيك بالموضوع