القائمة الرئيسية

الصفحات


 بايت في محله مطمان

يجري عالخبزة زوّالي.....
غدروه وهدّوا السّيسان
يشكيهم لله العالي....
وينك يا ريّس لبلاد
يا حالف بالله يمينك....
زادوا في عهدك فسّاد
وقّفهم يالله من حينك....
شعبك عنده مدّة راد
وانت الحاكم وسط عرينك...
حتى دستورك ما فاد
برشة ماتوا انت وينك....
يزينا ما صبرنا عاد!؟
متنا واحنا مستنينك....
ياما بنوها العمارات
وياما طلعوا برشة ديار...
بنوها عوض الكياسات
والا في قرطاج اثار...
والي يشريها دويرات
بمليم الرمزي و دينار...
فكوها برشة قطعات
وباعوها فوق المليار...
والراجل في كشكه بات
وقتلتوه جهار بهار...
بايت في محله مطمان
يجري عالخبزة زوّالي....
غدروه وهدّوا السّيسان
يشكيهم للّه العالي...
محمد القاسمي.....13|10|2020
(رحم الله عبد الرزاق الخشناوي)
متابعة : سهام بن حمودة
Reactions

تعليقات