القائمة الرئيسية

الصفحات


الرصيف ايوج ثلج صيفه 
وصهيل الروح دمعاته....
الكمر محروم من نومه 
وعليه اطوف نجماته 
المضيف ايون على الدله 
وميعرف عيب شباته 
العمر محروك بسنينه 
وطفت بسكوت شمعاته 
تعال وياي تالي الليل
بلكي انصفي نياته 
يليلك ياجرح ناطور 
من دون الخلك ظليت ماباته 
شله ابروحه وعمت عينه
اليفرح اكلوب شماته 
مدري اشبيه يفتر عكس ناعوره
السلف مبيوك والباكاه ناطوره
وهذاك الي هجرنه وراح 
كلي اشباك شاجوره....
يدمع العين دم ويجري نافوره
الظلام ابكل وكت مايوم شع نوره 
السفينه الشايلتنه اهواي مغروره 
بيها الناس صار اسنين مغدوره 
لا يلمكبره حاشاج معذوره...
اكلج ليش ماخذتي الحراميه 
اكلج ليش متعرفيني اشبيه 
حاكمنه شلك بيها السفينه 
الحملت الجياع...
زردها امكطعه ومابيها كل اشراع 
انزل منها وترجل ابنص الكاع 
مايحتاج شيل اذراع...
ابشرك كل فريسه اطيح
يسلط عليها الزاغ..
صدك هذا المثل من كال
اشما تاكل العنزه ايطلعه الدباغ 
بس الحظ صديق اوياك 
والحس شالته الغيره ويكلك ذاك 
وسرار الشعب موجده عدنه اهناك 
غم الوكت لو فد يوم نترجاك 
متحسفين بايعناك...
اسف غشتنه العمامه 
وعلى كرسي الحكم ياحيف صعدناك 
املنه الهواجس بيك وحنه اشجار 
تاليها ابكفانه وتطلع جويريد.
وكدام الشعب اسود مثل عاشور 
وبجنطت اسرارك حنطيت العيد 
ماتنزل بعد شتريد...
كبلك خلصينه امتاع ....
ماتدريها تكتل ثورة الجياع 
والعيشه أعلى هاي الكاع 
والموت أعلى هاي الكاع 
والفرحه أعلى هاي الكاع 
والدمعه أعلى هاي الكاع 
العراقين والله اسباع..
اليذلهم يرد مذلول 
شايل خيبته وعاره ....
مضايفنا اذا ثارت 
اول ماتحشم اهل العماره 
التفك لو ثارعدهم يعني البشاره
تظل دجلتنه مامونه
ونشب دخانه بعيونه 
وسنابل حط المحشم على النجمه 
وسراب وشمعه ماتطفه 
ومناجل رمش كل شاطي 
جهف ماكول ياجرفه 
هلال دمعة الميت 
جرح غمان مايشفه 
نعش يم دارك اظنوني 
نهر مخبوط مايصفه 
والصاعود لمن طاح
الحزن مافارك السعفه 
لجن ياحيف بعض الناس 
كالوا ليلتك ترفه وصدكك ترفه 
لمن حزن الدوارس 
شد جرح ولفه....
وشلت دمع الحزن 
بيدي ولكيته اتراب 
ياابشط خناجر غلفاها اكراب 
يا احلى البيادر نثراها اغراب 
يالغز الشعر عندي انرسم عالباب 
وطفن شمعاتنه ابيده 
طحنهن تحت رحاته 
وظل ليك جرح ناطور 
من دون الخلك ظليت ماباته

-------
متابعة : سلام سالم

Reactions

تعليقات